غزل

منم چې زه يې د جانان له سره ځار هم نه کړم
خو محبت خو زه د بل څه کار و بار هم نه کړم

څومره د ځان څومره په ځان دي پدې ښار کې خلک
خپلول پرېږده لا تر اوسه چا ازار هم نه کړم

ډېر تومتونه د يارانو به رښتيا شي په ما
ټوکه به وشي هغه يو سړی که يار هم نه کړم

لرې خبره ده مرگ ، زه درنه پدې شرمېږم
چې ستا ظالمې جدايۍ چېرته بيمار هم نه کړم

ممتاز له غره نه هم راکوز کړمه سر زوريه وخته
اوتر اوتر گرځم بلد دې په بازار هم نه کړم .